မိုးထက်အိမ်

ကစားမလား ၊ နားမလား

” ဆုံပြီးမှ ဖြတ်တဲ့ မျဉ်းနှစ်ကြောင်းနဲ့ အမြဲတမ်း ပြိုင်နေမယ့် မျဉ်းနှစ်ကြောင်းမှာ ဆုံပြီးမှ ဖြတ်ရမယ့် မျဉ်းနှစ်ကြောင်းကိုပဲ ငါ ရွေးမယ် … ဆုံတဲ့ အချိန်ဟာ တစ်စက္ကန့်လေးပဲ ဖြစ်စေဦးတော့ ငါမက်မောတယ် …”

- ကျွန်မ သူ့မျက်နှာကို ငေးကြည့်ရင်း စိတ်ထဲကနေ အဲလိုစကားတွေ ပြောနေချိန်မှာ သူက ပြောတယ် ….

“မသူ သိလား ၊ သူငယ်ချင်းဆိုတာကို ကျွန်တော် အရမ်း သဘောကျတာပဲ ၊ သူက ခုနေ မခေါ်လို့ ပြတ်သွားလည်း နေက် ဘယ်အချိန် ပြန်တွေ့တွေ့ ခေါ်တာပဲ.. ခေါ်လို့လည်း ရတယ်…. ရည်းစားကျ ပြတ်သွားပြီးရင် နောက် လမ်းမှာ မတော်လို့တွေ့ရင်တောင် ခေါ်ချင်တာ မဟုတ်ဘူး…. အဲဒါကြောင့် သူငယ်ချင်းနဲ့ ရည်းစားကိုသာ ကျွန်တော့ကို ရွေးခိုင်းရင် ကျွန်တော် သူငယ်ချင်းဆိုတာကိုပဲ ရွေးဖြစ်မယ်”

ဘုရားရေ …. သူ ကျွန်မ စိတ်ထဲ ၀င်ကြည့်လိုက်လို့များ စကားတွေက အဲလောက် ကွက်တိ ထွက်ကျလာတာလား ၊ နောက် သူက ဆက်ပြောတယ် …” မသူလည်း သိပါတယ် ၊ အဖြူပေါ် အမည်းစွန်းချင်လည်း လွယ်တယ် ၊ အမည်းပေါ် အဖြူစွန်းချင်ရင်လည်း လွယ်တယ် ၊ ဒါပေမယ့် အဖြူကို အဖြူအတိုင်း ၊ အမည်းကို အမည်းအတိုင်း ဆက်ထိန်းထားနိုင်ဖို့က ခက်တယ် “

“အိုကေ ၊ အိုကေ ၊ မသူ ပြောမယ် ၊ သေချာနားထောင် ၊ ဆုံပြီးမှ ဖြတ်တဲ့ မျဉ်းနှစ်ကြောင်းနဲ့ အမြဲတမ်း ပြိုင်နေမယ့် မျဉ်းနှစ်ကြောင်းမှာ ဆုံပြီးမှ ဖြတ်ရမယ့် မျဉ်းနှစ်ကြောင်းကိုပဲ မသူ ရွေးမယ် … ဆုံတဲ့ အချိန်ဟာ တစ်စက္ကန့်လေးပဲ ဖြစ်စေဦးတော့ မသူ တကယ်မက်မောတယ် …” ဒီစကားကို ကျွန်မ တစ်လုံးချင်း ပီပီသသ သေသေချာချာ ပြောလိုက်တယ် …. သူ ရယ်တယ် … ထွက်ပေါက်တစ်ခုအနေနဲ့ ရယ်တာလား … ဧ၀ရတ်တောင်ထိပ်မှာ တိုက်ဆောက်ဖို့ စိတ်ကူးယဉ်နေတဲ့ လူတစ်ယောက်အဖြစ်ကို သဘောကျသလို ရယ်တာလား ဆိုတာကိုတော့ သူမှပဲ သိလိမ့်မယ် …. ကျွန်မမှာ သူ့စိတ်ထဲကို ၀င်ကြည့်နိုင်လောက်တဲ့ အရည်အချင်းမရှိဘူးလေ … ဒါ ကျွန်မကိုယ် ကျွန်မ ပေးထားတဲ့ မှန်ကန်နေတဲ့ မှတ်ချက်လေးတစ်ခုပါ … သူနဲ့ကျွန်မ စတွေ့တဲ့ သိပ်မကြာခင် ကာလလေး အတွင်းမှာပဲ ဒီမှတ်ချက်ကို ကျွန်မ ချမှတ်ခဲ့ရတာ …. ဒီမှတ်ချက်ကို ပယ်ဖျက်ဖို့ ကျွန်မ အကြိမ်ကြိမ် ကြိုးစားတယ်…. ဒါပေမယ့် ကြိုးစားလိုက်တိုင်း ရလာတဲ့ ရလာဒ်က ထပ်လောင်းအတည်ပြုဖို့ ဆိုတာတွေချည်း ဖြစ်ဖြစ်နေတယ် … ခုလည်း ကျွန်မ ထပ်ပြီး အတည်ပြုလိုက်ရပြန်ပြီ … ဟူး … အခြေအနေက ရုတ်တရက် ခြောက်သွေ့သွားတယ် … အရင်လို စလိုက် နောက်လိုက်နဲ့ စိုစိုပြေပြေဖြစ်ဖို့ ကြိုးစားမှ ဖြစ်မယ်…. ဟူး …. စကားလုံးတွေကလည်း ခုမှ ဘယ်ပျောက်ကုန်လည်း မသိဘူး …. ရှားပါးနေလိုက်ကြတာ ….။

“မသူ”
-သူ ခေါ်တယ် …. ကျွန်မ ဘာပြန်ပြောရမလဲ မသိဘူး….။
“………..”
“ကစားပွဲတစ်ခုကို ကစားတဲ့အခါ နိုင်မှာမှန်း သေချာသိနေရင် ကစားရတာ ရင်ခုန်ဖို့ ကောင်းမှာ မဟုတ်ဘူးနော် မသူ ၊ အဲလိုရင်ခုန်စရာ မကောင်းတဲ့ ကစားပွဲကို မသူ အနေနဲ့ဆိုရင် ကစားချင်မလား”
“မသူ ……..”
မိုးထက်အိမ်

2009: 12/28
POSTED BY: မေကျော်
CATEGORY: ရသစာတို
12 comments

ပခုက္ကူ ဆိုတဲ့ နာမည်ဖြစ်ပေါ်လာပုံ

သားထုတ်ဂူ မှ ပခုက္ကူ

အလောင်းစည်သူဘုရင်မင်းမြတ် သက္ကရာဇ် ( ၄၅၄ ) သည် ဖောင်စင်္ကြာနှင့် ဧရာဝတီမြစ်နဒီတွင် ခရီးလှည့်ခဲ့ဘူးသည်၊ မင်းမြတ်နှင့်တကွ မောင်းမမိဿံ အခြွေအရံများစွာ ပါဝင်သည်၊ ထို အခြွေအရံများအနက် ကိုယ်ဝန်ရှိနေသော မောင်းမတစ်ဦး( တနည်း မယ်စိမ့်ညို )သည် ပေါက်အင်းအနီး ဆိုက်ရောက်သည်တွင် တံငါလုလင်တို့ကိုမြင်၍ မိန်းမကောင်းတို့၏ ဣနြေ္န ကို ဖောက်ဖျက်လျက် နှစ်သက်သည့် အသွင်ဖြင့် ရယ်သွမ်း၏၊ ထိုအခြင်းအရာကို မြင်သော အလောင်းစည်သူသည် ဒေါသအမျက်ပွက်ဆူ၍ ကျိန်စင်္ကြာဖြင့် ရိုက်နှက်ရာ လက်လွန်ကာ အသက်ဆုံးရှုံး ကံကုန်ရှာလေသည်။

အလောင်းကို ဖောင်စင်္ကြာပေါ်တွင် ခွဲစေရာ သားသူငယ်အလောင်းကိုတွေ့၏။ ဘုရင်တို့ထုံးစံအတိုင်း ဖောင်တော်ဆိုက်ကပ်၍ ရွှေဂူဘုရား တည်မည့်နေရာတွင် အခမ်းအနားဖြင့် ဈာပနပွဲကျင်းပလျက် သားငယ်အလောင်းကို အုတ်ဂူပြုလုပ်၍ ထားခဲ့သည်။ သားကိုထုတ်၍ ဂူလုပ်ခဲ့ရာမှ သားထုတ်ဂူ၊ ကာလကြာမြင့်သဖြင့် သားထုတ်ဂူမှ ရွေ့လျားလာကာ ပခုက္ကူ ဖြစ်လာကြောင်း အစဉ်အဆက်ဥဒါန်းတွင်ခဲ့သည်။
အချို့ ရာဇ၀င်ဆရာတို့က အလောင်းကို ဖက်နှင့် ထုပ်၍ ကူ( ဂူ ) လုပ်ရာ ဖြစ်ရကား သားထုပ်ဂူ မှ ပခုက္ကူဖြစ်လာကြောင်း ဆိုကြသည်။ ထို့ကြောင့် သဲပုံစေတီထေရုပ္ပတ္တိကျမ်း ပထမကြငှန်းထီးဖွင့်ရန်အဆို၌

သမတ အတုစနစ်၊ သမယ ယခုခေတ်တွင်၊ နရလူ့ ဓမ္မရာဇ် တနာမည်ပြောင်းတဲ့၊ ပုဂံပြည် လောင်းစည်သူမင်းသည် ဇမ္ဗူအတွင်း တောင်လက်ယာမှာ၊ ညီမူတသင်း ပြောင်လက်စွာနှင့်၊ ဖောင်စင်္ကြာ ဖြန့်တုံအခါက၊ မြန့်ဘုံရာဇာမိဖုရားတပါး သားနရိန်ကို၊ ပတ္တမြားစိန် ဖက်နှင့်ထုပ်ပြီး၊ ခပ်သုတ်သုတ်ကူသို့သွင်းတာကြောင့်၊ လူတို့ခပင်း သားထုပ်ကူဟု၊ အများနှုတ်မူ ၀စီမင်္ဂလာဖြင့်၊ အမည်ထွင်ကာ အသရေ မူမချို့ပေသော၊ ရွှေကူမြို့ မြင်သာ ဆုံကုန်းရပ်၌

စသည်ဖြင့် လာရှိသည်။

ပခန်းအုတ်ကူ မှ ပခုက္ကူ

ရှေးက တပ်ကြားရပ်၏ အရှေ့ဘက်သည် ပခန်းနယ်ဖြစ်၍ တပ်ကြား၏အနောက်ဘက်သည် မြင်သာရွာကြီးဖြစ်လေသည်။ တပ်ကြားရပ်သည် မြင်သာနှင့် ပခန်းနယ်စပ် ဖြစ်ခဲ့သည်။အလောင်းစည်သူသားကို ကူတည်လုပ်ခဲ့ရသည်၊ ပခန်းနယ်ဘက်၌ ဖြစ်၍ ၎င်းကူကို ပခန်း အုတ်ကူ ဟုခေါ်ကြသည်။ ပခန်းအုတ်ကူ အနီးအစပ် တည်သော ရွာကိုလည်း ပခန်းအုတ်ကူရွာဟု ခေါ်ခဲ့ကြရာမှ ပခန်းအုတ်ကူရွာ မှ ပခုက္ကူရွာ ဖြစ်လာသည်။ တဖြည်းဖြည်း စည်ကားလာ၍ ပခုက္ကူမြို့ ဖြစ်လာခဲ့ရာ အင်္ဂလိပ် လက်ထက်တွင် ခရိုင်မြို့ဖြစ်လာခဲ့သည်။

ပခုက္ကူမိသားစု မှ pkufriends ၏ ပို့စ်ကို စာလုံးပေါင်း အနည်းငယ်ပြင်၍ ပြန်လည်တင်ပြခြင်းဖြစ်ပါသည်….။
ယခုအခါ ပခုက္ကူအား ဧရာအနောက်မြို့တော် ဟုလည်းခေါ်တွင်သည်။
ဒါတွေကတော့ Google Map ကနေ Pakokku ဆိုပြီး ရှာကြည့်ထားတာတွေပါ….။

မိုးထက်အိမ်

2009: 12/23
POSTED BY: မေကျော်
CATEGORY: ဖတ်မိ ကြိုက်မိသမျှ
ဆောင်းပါး
11 comments

ဖြူလေးလွမ်းခိုင်းတဲ့ ကလေးသမိုင်း

မနေ့က ရုံးပိတ်ရက်ဆိုတော့ အိမ်မှာ လိုအပ်တာလေးတွေဝယ်ဖို့ အမေနဲ့တူတူ မြို့မဈေးဘက်က ယဉ်ယဉ်စတိုးကို လိုက်သွားလိုက်တယ် …. ကိုယ်ဖို့လည်း လိုတာလေးတွေရှိရင် ညာတာပါတေးနဲ့ အမေ့ကိုဝယ်ခိုင်းဖို့ပေါ့… ပြောရရင်လည်း ရှက်ဖို့ကောင်းပါတယ် …. အသက်သာ နှစ်ဆယ်ကျော်ပြီးလို့ လေးနှစ်ကြီးများတောင်ပြည့်ပြီးသွားတာ ခုထိ အဖေနဲ့ အမေ့ကို ဒုက္ခပေးလို့ ၀သေးတာ မဟုတ်ဘူး …. ဒါနဲ့တောင် သမီးပုခုံးက ကောင်းပါတယ်အမေရဲ့ ဆိုပြီး အမေတို့ စိတ်ချမ်းသာအောင် ရွှီးတတ်သေးတာ…. မိဘဆိုတော့ ကိုယ့်သားသမီး ရွှီးနေတာလား တကယ်လား သိတာပေါ့လေ … ဒါပေမယ့် နားထောင်ကောင်းတော့ ခပ်ပြုံးပြုံးပဲပေါ့ …. ကိုယ့်ကိုယ်ကိုလည်း နည်းနည်းပါးပါးတော့ သိပါတယ် … အသုံးမကျဘူးဆိုတာ… ဒါပေမယ့် ကိုယ့်ထက်ဆိုးတဲ့လူတွေ တပုံကြီးပါလေဆိုပြီး ရင့်ကျက်မလာတဲ့ ဖြေတွေးလေးနဲ့နေနေရတာပဲ … ခုလည်း ဈေးခြင်းတောင်းလေး ကိုင်ပြီး အိမ်ဖို့လိုတာရော ၊ ကိုယ့်ဖို့လိုတာရော ရောသမမွှေလို့ ၀ယ်နေပြီ ….။

”ဟယ် ၊ မမ၀င်း နေကောင်းလား ၊ မတွေ့တာတောင်ကြာပြီ ” ဟာ လုပ်ပြီ ၊ အမေတို့ကတော့ အဲလိုပဲ သွားတဲ့နေရာ အသိရှိတယ် … အမေ့အသိတွေနဲ့တွေ့ရင် စိတ်ရှုပ်လွန်းလို့ ၊ အဟုတ်ပြောတာ ၊ ကိုယ်လည်းမသိဘဲနဲ့ ပြုံးပြရ ၊ နှုတ်ဆက်စကားပြောရ ၊ ဘာနဲ့ကျောင်းပြီးပြီ ၊ ခု ဘာလုပ်နေတာ အာ ဘာတွေမှန်းမသိဘူး အဲလိုတွေ ပြောရတာ သိပ်စိတ်ရှုပ်တယ် …. အမေနဲ့သွားရင် ဒါမျိုးတွေက ကြုံမှာပဲလေ … ခုလည်း လူကိုလှမ်းခေါ်နေပြီ … ဟွန်း… သမိုင်းပေးတာဝန်အရ ပြောရဆိုရဦးမယ်…. “အော် ဒါ သမီး အကြီးလေးလား ၊ ငယ်ငယ်တုန်း ရုပ်ရှင်ရုံထဲမှာ အာဗြဲကြီးနဲ့ အော်ငိုတဲ့ ကလေးလေးပေါ့ ၊ ဟုတ်လား သမီး ” “အယ် ၊ သမီး မမှတ်မိဘူး ” “အင်းပေါ့ သမီးက ငယ်သေးတာကိုး ဘယ်မှတ်မိမှာလဲ၊ ငယ်ငယ်က တော်တော်ဆိုးတာပဲ ၊ ခုရော ဆိုးတုန်းပဲလား ၊ ရုပ်လေးကတော့ အချောလေးတော့ မမ၀င်းသမီးက ” တဲ့…. နောက်ဆုံးပိတ်စကားအဆုံးသတ်လေး လှလို့သာပေ့ါလေ … မဟုတ်ရင် ဒေါ်မေကျော်တို့မျက်နှာ မှုန်ကုပ်သွားပြီသာမှတ် …. ။

အိမ်လည်းရောက်ရော အမေ့ကိုမေးတော့တာပေါ့ … အမေ သမီးငယ်ငယ်က တော်တော်ဆိုးလားလို့ …. အမေကပြောတယ် ကိုယ့်ကိုယ်ကို မသိဘူးလား တဲ့ …. အင် ဘယ်မှတ်မိမှာလဲနော် …. တကယ်လို့ ဆိုးခဲ့တယ်ဆိုလည်း နည်းနည်းပါးပါးပဲ နေမှာပါ… ဒါပေမယ့် လူ့လောကထဲ စမရောက်ခင်တည်းက အမေတို့ကို ဒုက္ခပေးခဲ့တာတော့ အမှန်ပဲ… သက်ဦးလည်း ဖြစ်ပြန် ၊ ကလေးအနေအထားကလည်း သူများတွေလို ခေါင်းကနေ အတည့်မထွက်ဘဲ ခြေထောက်ကနေ စထွက်မယ့် အခြေအနေဆိုတော့ ရိုးရိုးမမွေးရဲဘဲ ပခုက္ကူကနေ ရန်ကုန်ကို တကူးတက လာပြီး ခွဲမွေးရတယ်လေ… စတည်းက ကန့်လန့်တိုက်ပြီး မွေးလာတာတဲ့ … မွေးကာစကလည်း ၀မ်းတွေ တအားသွားလို့ အဒေါ်တွေမှာ အနှီးတွေမနားတမ်း လျှော်ရတယ်ဆိုတာ့ နည်းနည်းပါးပါး ဆိုးတယ်လို့တော့ ပြောလို့ရပါတယ်…. ။

တစ်ခါ ၃ ၊ ၄ နှစ်အရွယ်လောက်ရောက်တော့ မိဘနှစ်ပါးလုံးက ၀န်ထမ်းဆိုတော့ အထိန်းရသက်သာအောင်ပဲလား မသိဘူး … မူကြိုပို့လိုက်တယ် … အန်တီကြီးပြောသလို ရုပ်ရှင်ရုံထဲမှာ ငိုမငိုတော့ မမှတ်မိတော့ဘူး…. မူကြိုတူတူတက်ရတဲ့ မောင်ဝမ်းကွဲတစ်ယောက်နဲ့ပေါင်းပြီး မူကြိုအကပွဲမှာ ပွဲတိုင်းလိုလိုပါချပစ်လိုက်တာတော့ မှတ်မိတယ်…. အဲဒီတုန်းက ချင်းအက ၊ ရွှေအိုးစည်အက ၊ ကဗျာရွတ် အက နောက် ဘာလဲ မမှတ်မိတော့ဘူး … ဒါတောင် ယိုးဒယားကန်တော့ခန်းဖို့ ခေါ်သေးတယ် …. လုံချည်က တုတ်နေလို့ မကတတ်လို့ လွတ်သွားတာ…. ရွှေအိုးစည်က ကခါနီးတုန်းကလည်း တောင်ရှည်ပုဆိုးကြီးက ကျွတ်ကျွတ်ကျလို့ ဆရာက ကြိုးနဲ့ချည်ပေးလိုက်တာလည်း မှတ်မိတယ်…. အင်္ကျီတွေ တစ်မျိုးပြီး တစ်မျိုးလဲပြီးကရတာဆိုတော့ ပျော်တာပေါ့….. ဒါပေမယ့် အိမ်ဘက်က ကြည့်ရင်ကျ အလုပ်ရှုပ်လို့ မူကြိုပို့တာ ပိုရှုပ်သလိုဖြစ်သွားတော့ ရိုက်ချင်စရာ ကောင်းသွားတာပေါ့…. နောက် ညီမလေးတွေ အလှည့်ကျ ဘာအကမှ မပါရတော့ဘူးဆိုပြီး ဖြစ်သွားလောက်အောင်ထိကို စိတ်နာသွားတာ အိမ်က… ဟ ဟ …။

မူကြိုနေပြီးသားမို့ထင်တယ် သူငယ်တန်းတက်ရမယ်ဆိုတော့ ဘာမှ စိတ်ထဲမခံစားလိုက်ရဘူး …. ၅ နှစ်ပြည့်ဖို့ ၅ လလောက်လိုသေးတယ်ဆိုပေမယ့် အမေတို့က တတ်ဆိုပြီး အသက်ကြီးထားတော့ တတ်လိုက်ရတာပဲ … အဲဒီနှစ်တွေကတော့ ဘာမှ ထူးထူးခြားခြား မဖြစ်လိုက်ဘူးထင်တာပဲ …. ဒါမှမဟုတ် ကိုယ်ကပဲ မမှတ်မိလိုက်လို့လား မသိဘူး…. ဘာမှ မထူးခြားဘူး …. တစ်ခုပဲ ဘယ်ကလေးနဲ့ ယှဉ်ယှဉ် ကိုယ်က ညှက်နေတာရယ် ၊ အသားမဲမဲ ပိန်ပိန်ဖြစ်နေတာရယ်ပေါင်းပြီး မေပုလဲ ၊ ဒေါ်မြလေး ဆိုပြီး အခေါ်ခံရတာ အဲဒီအရွယ်လောက်တည်းက…. အဲလို အခေါ်ခံရလို့လည်း စိတ်တိုရမှန်း မသိပါဘူး…. ဘယ်သူ စ စ ကို သိပ်စိတ်မဆိုးတတ်တာ…. စိတ်ဆိုးရကောင်းမှန်း မသိတာလည်း ဖြစ်နိုင်တယ် …. အဲလိုဆိုလို့တော့ ဦးလေးတွေက အေးလို့ဆိုပြီး ပန်ကာ လို့ နာမည်ပေးတယ်… လူအေးလေးပေါ့….။

ငယ်ငယ်တုန်းက အေးလည်း အေး ၊ အ လည်း အ ပုံပေါ်တယ် …. စာကလည်းအတော်ကြီးထဲ မပါဘူး … သင့်သင့်ပဲ …. ဟုတ်တယ် …. ၃ တန်းတုန်းက သချာင်္ရည်ချွန်ရတာ ကိုယ်ကတော့ ပျော်လွန်းလို့ အိမ်ကို အပြေးတပိုင်းနဲ့ ပြန်ပြီး ပြောရတယ်…. အိမ်က လာမနောက်နဲ့တဲ့…. ကဲ ကောင်းလား … တော်တယ်ဆိုတာ အဲလောက်ထိကို အသိအမှတ်ပြုခံခဲ့ရတာ…. အဲဒါ အိမ်ကမယုံလို့များ ငိုပြီး ပြောမယ် မထင်နဲ့ဗျာ…. မယုံလည်း နေ ဆိုပြီး ခပ်တည်တည်ပဲ နေလိုက်တာတဲ့…. အဲဒါ ကျောင်းမှာ အလုပ်အမှုဆောင် လုပ်တဲ့ ဦးလေးက လာပြီးပြောမှ အိမ်က ယုံတယ် …. ဘာလို့ သေချာမပြောတာလဲ ဆိုပြီးတောင် အဆူခံလိုက်ရသေးတယ် …. ပြီးတော့ ပြောသေးတယ် ထုံပေပေနဲ့တဲ့…. အမှန်တော့ ဘယ်လိုယုံအောင် ပြောရမှန်း မသိလို့ မပြောတော့တာပါ … အဲဒါကိုပဲ သူတို့က ထုံပေပေ ဆိုတော့ ထုံပေပေလိုက်ရုံပဲ ရှိတာပေါ့… တတ်နိုင်ပါဘူး….။

နောက်ရှိသေးတယ် ငယ်ငယ်က အ၀ှာဆိုတဲ့စကားကို အမုန်းသုံးတာ… စကားတစ်ခုပြောမယ်ကြံတိုင်း “အမေ ၊ အ၀ှာလေ ၊ သမီးပြောမယ် ၊ အ၀ှာ…” ဆိုပြီး လိုရင်းရောက်ဖို့ အ၀ှာဆယ်ခါလောက်ပါတယ်…. အဖေကြိမ်လုံးကိုင်ပြီး ပြင်ခိုင်းမှ အ၀ှာပြုတ်သွားတာ…. မဟုတ်ရင် ခုထိသုံးမိဦးမယ် ထင်တယ်…. အဲဒီတုန်းကတော့ ကလေးဆိုတော့ အ၀ှာ ဆိုတာလေး ထည့်သုံးတာကိုက စတိုင်လို့ ထင်နေတာလေ…. ။

အဲလောက်ပါပဲ …. မှတ်မိသလောက်တော့ ကိုယ်ဆိုးခဲ့တာကြီးတွေ သိပ်မပါ ပါဘူး… ဘယ်လိုလုပ်ရမှန်း မသိလို့ လုပ်တတ်သလို ၊ နေတတ်သလို နေခဲ့တာတွေပဲ ရှိတာပါ …. တစ်ခါတစ်လေ ကလေးအတွေးနဲ့ ကောင်းမယ်ထင်တာလေးတွေကို ကောင်းမယ်ထင်သလို လုပ်ကြည့်ခဲ့တာလေးတွေလည်း ရှိတာပေါ့…. သိပ်တော့ ထူးထူးခြားခြား မကြုံခဲ့ရပါဘူး…. ဒါပေမယ့် ကလေးဘ၀ဆိုတာတော့ ပြန်တွေးတိုင်း လွမ်းမိတာချည်းပါပဲ….။

မိုးထက်အိမ်

2009: 12/21
POSTED BY: မေကျော်
CATEGORY: Tag
ကိုယ့်အကြောင်း
အမှတ်တရ
15 comments

စုန်းပူးတဲ့ ဒီဇင်ဘာ

ဥသြ ဥသြ
ဟင် ဘာသံပါလိမ့်
ဥသြ ဥသြ
! …. သေချာတယ် ဒါဥသြတွန်သံ….

ဒီဇင်ဘာ ဆောင်းလယ်ခေါင်မှာ
ဒီဥသြ ဘာကြောင့်တွန်ပါသလိမ့်…
ရာသီမှားရင် မှား
မမှားရင်
စည်းကျော်ဖို့ကြိုးစား ဒီတစ်ယောက်ကိုများ
အား ကျ လို့ လား … ။

မိုးထက်အိမ်

2009: 12/19
POSTED BY: မေကျော်
CATEGORY: ကဗျာ
11 comments

ငှက်ကလေးသို့

ငိုချင်တာမလား ၊ ငိုချလိုက်လေ ၊ ငိုချလိုက် ၊ ငိုချလိုက် ၊ ဟုတ်သေးပါဘူး ၊ ဘာလို့ ငိုရမှာလဲ၊ ဒါက ငိုစရာလား မငိုနဲ့ မငိုနဲ့ မော့ မော့ ဟိုး ကောင်းကင်ကြီးကို မော့ကြည့်လိုက် မော့ မော့ …. ဟာကွာ ဘာလဲ ငိုရမှာလား ၊ မငိုရဘူးလား ၊ မငိုဘဲ စိတ်ကို တင်းထားရမှာလား ၊ ဒီလောက်ငိုချင်နေတာ ငို ဆိုပြီး စိတ်ကို လွှတ်ချလိုက်ရမလား ….. ဟင့်အင်း မသိတော့ဘူး …. အဲလိုနဲ့ လွန်ဆွဲနေတာ လူက မောလာပြီ …. ။

ငှက်ကလေး …. ဒီငှက်ကလေးက ဟိုးသစ်ပင်အမြင့်ကြီးမှာ အသိုက်သွားဆောက်နေတယ် ….ဟုတ်တယ် …. သေချာတယ် …. သြော်- ဒီငှက်ကလေး တခြားမှာ အသိုက်ဆောက်တာတွေ့လိုက်ရလို့ ၀မ်းနည်းပက်လက် ဖြစ်သွားတာလား …. ဒီငှက်ကလေး အမြဲတမ်း ပျံသန်းနေတာ တွေ့ချင်လို့လား ….. သေချာစဉ်းစားပါဦး … ငှက်ကလေးက အမြဲတမ်း ဘယ်ပျံနိုင်မလဲ … သူလည်း နားချင်မှာပဲ … နားခိုဖို့ရာအသိုက်လည်း ဆောက်မှာပဲ …. အဲဒါကို ဒီငှက်လေး အမြဲပျံနေတယ်လို့များ ဘယ်လိုကြောင့် တွေးမိပါလိမ့် … ဘာလို့များ အမြဲတမ်း ပျံသန်းနေတာ မြင်ချင်ပါလိမ့် … မဟုတ်ပါဘူး …. သူ အမြဲတမ်း ပျံသန်းနေတာ မြင်ချင်တာ မဟုတ်ဘူး …. သူ တခြားမှာ အသိုက်အမြုံဆောက်လိုက်တဲ့အတွက် နောက်တစ်ကြိမ် ဒီဘက်ကို ပျံသန်းမလာတော့မှာ စိုးတာပါ …. ဟုတ်တယ်ဟုတ် ….။
အဲဒီငှက်လေးငယ်စဉ်က သူအစာရှာရ ခက်နေတဲ့ အချိန်မှာ ကိုယ်တတ်နိုင်သလောက် ကျွေးမွေးပြုစုခဲ့ပြီးပြီ …. သူပျံသန်းနိုင်အောင်လည်း ခွန်အားတွေ ပေးခဲ့ဖူးပြီ ….. သူ ပျံသန်းနေတာကိုလည်း ပျော်ရွှင်စွာ ကြည့်ခဲ့ဖူးပြီ …. သူ နားချင်ရင် နားခိုဖို့လည်း ပခုံးတစ်ဖက် ပေးငှားခဲ့ဖူးပြီ …. ခု သူ ဒီထက်ပိုပျော်ဖို့ကောင်းတဲ့ နေရာကို တွေ့လို့ ထွက်ခွါချင်နေပြီ …. ထွက်ခွါပါစေပေါ့ ….. သူ့ကိုဘာလို့ ချုပ်နှောင်ထားမှာလဲ ….. ဘာလို့ လှောင်အိမ်ထဲ သွင်းထားရမှာလဲ …. သူ လွတ်လပ်စွာ ပျံသန်းပါစေ …. ။
သူ ပျံသန်းနိုင်လေလေ ၊ သူ့အတွက် လုံခြုံတဲ့ နေရာ ရှာဖွေတွေ့လေလေ ကိုယ်ဘက်က ကြည်နူးရလေလေပဲ မဟုတ်လား …. ။

မိုးထက်အိမ်

2009: 12/12
POSTED BY: မေကျော်
CATEGORY: ရင်တွင်းစကား
15 comments

သည်းခံခြင်းရေချိန်အမှတ် Minus

*တူတူလျှောက်ဖို့
ငါ ခင်းတဲ့ဒီလမ်း
နင် မလှမ်းလို့လည်း
ရက်စက်တယ်လို့ သမုတ်
စွပ်စွဲမယ့် လူမဟုတ်ဘူး ချစ်သူ
နင် စိတ်ချမ်းသာသလို နေပါစေ …..။

*တူတူလျှောက်ဖို့
တွဲခေါ်တဲ့ ဒီလက်
နင် ဖြုတ်ချပစ်ခဲ့လည်း
လုက်ရက်တယ်လို့ မငြူစူ
နင် ပျော်ဖို့သာ ရှေးရှုမှာပါလေ …. ။

*အများတကာလို
နင် မသိတဲ့ ငါ့ချစ်ခြင်းလို့
ညည်းစရာမလို နင် အလိုလို သိနေခြင်းနဲ့ကို
ပြီးပြည့်စုံခြင်းဆိုပြီး ရူး
စိတ်ကြည်နူးနေမယ့် လူပါလေ … ။

*လွတ်လပ်စွာ လျှောက်လှမ်းခွင့်
လွတ်လပ်စွာ ပျံသန်းခွင့်
လွတ်လပ်စွာ တွေးခေါ်ခွင့်
လွတ်လပ်စွာ လွင့်မျောခွင့်
လွတ်လပ်စွာ …
လွတ်လပ်စွာ …
လွတ်လပ်စွာ …
   .
   .
   .
လွတ်လပ်စွာ ချစ်ခွင့်ဆိုတာတွေကြားမှာ
နင်တစ်ယောက် လွတ်လပ်စွာနဲ့
တခြားတစ်ယောက်ကို ရင်တွေခုန်နေတာ
သိနေပြန်တော့…..။

*တိတ်တဆိတ်ပဲ ငါ့နှလုံးသားကို
ရာဇသံပေးလိုက်တယ်

” နင် ငြိမ်ငြိမ်နေ …. ! ”

မိုးထက်အိမ်
Dec 10, 2009
11:01 am

2009: 12/10
POSTED BY: မေကျော်
CATEGORY: ကဗျာ
21 comments

မိုးရေထဲဝယ် ကကြမယ်

အလုပ်ရှုပ်တဲ့တစ်မနက် ၊ (၈) နာရီခွဲလောက်မှာ အသက်ရှစ်ဆယ်ကျော် အဘိုးအိုတစ်ယောက် သူ့လက်မက ချုပ်ရိုးဖြည်ဖို့ ရောက်လာတယ်။
၉း၀၀ နာရီလောက်မှာ ချိန်းထားတာ တစ်ခုရှိလို့ အလျင်လိုနေကြောင်း ပြောတယ် ။
သူရဲ့ အရေးတကြီးဖြစ်နေတဲ့ အခြေအနေကိုကြည့်ပြီး ထိုင်ခုံမှာ ထိုင်ခိုင်းလိုက်တယ် ။ တစ်ယောက်ယောက်က သူ့ကို မတွေ့ခင်အထိ တစ်နာရီကျော်လောက် ကြာမှာ သိနေတယ်။
သူ နာရီတကြည့်ကြည့်ဖြစ်နေတာကိုမြင်ပြီး င့ါမှာလည်း နောက်လူနာ မရှိတော့တာမို့ သူ့အနာကို ကြည့်ပေးဖို့ ဆုံးဖြတ်လိုက်တယ်။
စစ်ဆေးကြည့်ရာမှာ အနာက ကောင်းကောင်းကျက်နေပြီ။ ဒါနဲ့ ဆရာဝန်တစ်ယောက်ကိုခေါ် ၊ ချုပ်ရိုးဖြည်ဖို့ လိုတာတွေ ယူလာခိုင်းပြီး သူ့အနာကို ပြန်စည်းပေးလိုက်တယ် ။ သူ့အနာကို ဂရုတစိုက်လုပ်ပေးရင်း ဒီလောက်လောနေရအောင် တခြားဆရာဝန်တစ်ယောက်နဲ့ ချိနးထားတာများ ရှိနေသလားလို့ မေးကြည့်တယ်။
အဘိ်ုးအိုက မရှိပါဘူးလို့ပြောတယ်။ ဘိုးဘွားရိပ်သာကိုသွားပြီး သူ့မိန်းမနဲ့ မနက်စာ သွားစားဖို့ပဲ ရှိပါတယ်တဲ့။
သူ့မိန်းမရဲ့ ကျန်းမာရေးကို သတင်းမေးတော့ သူမ အဲဒီကိုရောက်နေတာ သိပ်မကြာသေးပါဘူးတဲ့ ။ သူမဟာ အယ်လ်ဇိုင်းမားရောဂါ ခံစားနေရသူ ဖြစ်တယ်လို့လည်း ပြောပါတယ် ။
အံ့အားသင့်သွားပြီး မေးကြည့်လိုက်တယ် ။

“အဘိုးဘယ်သူလဲဆိုတာ အဘွားက မသိတာတောင်မှ ဘာလို့ အဘိုးက မနက်ခင်းတိုင်းသွားနေတာလဲဟင်”

“သူမကတော့ ငါဘယ်သူလဲဆိုတာ မသိတော့ဘူးပေါ။ ဒါပေမယ့် သူမ ဘယ်သူဆိုတာ ငါက သိနေသေးတာကိုး”

သူပြန်သွားချိန်မှာ မျက်ရည်ထိန်းထားရပါတယ်။
လက်မောင်းမှာ ကြက်သီးမွေးညင်းထရင်း တွေးလိုက်မိပါတယ်။ “ဒါဟာ င့ါဘ၀မှာ လိုချင်နေတဲ့ ချစ်မေတ္တာအမျိုးအစားပဲ”
အချစ်စစ် အချစ်မှန်ဆိုတာ ကိုယ်ခန္ဓာမဟုတ်သလို ချစ်ရေး ချစ်ရာလည်း မဟုတ်ဘူး။ ဖြစ်ခဲ့တာ ၊ ဖြစ်လာမှာ ၊ မဖြစ်လာမှာ အားလုံးကို သည်းခံခွင့်ပြုတာဖြစ်ပါတယ် ။
အီးမေးလ်ထဲက လာတဲ့ဟာသတွေ ပျော်စရာတွေနဲ့ အတူ တစ်ခါတစ်လေ အရေးပါတဲ့ သတင်းစကားလည်း ပါလာတတ်တယ် ။ ဒီတစ်ခုတော့ ခင်များတို့ကို မျှဝေနိုင်မယ် ထင်ပါတယ် ။
အပျော်ဆုံးလူဆိုတာ အရာရာ အကောင်းဆုံးတွေ ရှိနေဖို့ မလိုအပ်ပါဘူး ။ သူတို့ဆီမှာ ရှိနေတာတွေကို အကောင်းဆုံးဖြစ်အောင် လုပ်နေသူတွေသာ ဖြစ်ပါတယ် ။

ဘ၀ဆိုတာ မုန်တိုင်းကို ဘယ်လိုလွန်မြောက်ရမယ်ဆိုတာ မဟုတ်ပါဘူး ။ မိုးရေထဲမှာ ဘယ်လို ကခုန်ရမယ် ဆိုတာပဲ ဖြစ်ပါတယ်။

Light မဂ္ဂဇင်းထဲက မျိုးကိုကို ရဲ့ရသစာကို ပြန်လည်မျှဝေခြင်း ဖြစ်ပါသည်….

2009: 12/07
POSTED BY: မေကျော်
CATEGORY: ဖတ်မိ ကြိုက်မိသမျှ
ရသစာတို
11 comments

အနီးမှာလား အဝေးမှာလား

ချမ်းကို တစ်ယောက် သူ့အိမ်လေးမှာ နေရထိုင်ရတာ ငြီးငွေ့လာတယ်…ဒီအိမ်ကို ရောင်းပြီး ခုလက်ရှိအိမ်ထက် ကောင်းတဲ့ အိမ်လေးတစ်လုံးဝယ်ဖို့ စဉ်းစားမိတယ် …. အဲဒါနဲ့ ရောင်းဖို့ ကြိုးစားတယ်…. အချိန်သာ ကြာလာတယ် သူ့အိမ်လေးက ရောင်းမထွက်ဘူးဖြစ်နေတယ်…. နောက်ဆုံး အိမ်ခြံမြေ အကျိုးဆောင် ကုမ္ပဏီတစ်ခုနဲ့ ဆက်သွယ်ပြီး ရောင်းမယ်လို့ ဆုံးဖြတ်လိုက်တယ်….။
အကျိုးဆောင်ကုမ္ပဏီက ချမ်းကိုရဲ့အိမ်ကို မြန်မြန်ရောင်းနိုင်ဖို့ နာမည်ကြီး မဂ္ဂဇင်း တစ်ခုမှာ ကြော်ငြာထည့်တယ် … ကြော်ငြာထဲက ချမ်းကိုရဲ့ အိမ်လေးဟာ အရမ်းလှတယ် ၊ ဆွဲဆောင်မှုတွေနဲ့ ပြည့်ဝနေတယ် … ဒီအိမ်လေးနဲ့အတူ ရင်သပ်ရှုမောဖွယ် ပန်းဥယျာဉ်လေးတစ်ခုပါကြောင်းကိုလည်း ကြော်ငြာထဲမှာ ရေးသားဖော်ပြထားတယ်….။
ချမ်းကိုတစ်ယောက် ကြော်ငြာကို မြင်မြင်ချင်းပဲ စေ့စေ့စပ်စပ်ဖတ်လိုက်တယ် …. အဲဒီနောက် အကျိုးဆောင် ကုမ္ပဏီဆီကို အောက်ပါအတိုင်း ဖုန်းဆက်ပြောလိုက်တယ်…။

“အားတော့ နာပါတယ် ဦးကြည်မိုးရယ် ၊ ကျွန်တော့်အိမ်ကို မရောင်းတော့ဘူးလို့ ဆုံးဖြတ်လိုက်ပြီ ၊ ဒီမဂ္ဂဇင်းမှာ ကျွန်တော့်အိမ်ကြော်ငြာကိုတွေ့လိုက်တည်းတ ကျွန်တော့် ဘ၀တစ်သက် နေထိုင်ချင်တဲ့ အိမ်ပုံစံဟာ ဒီအိမ်ပဲလို့ ကျွန်တော် သိလိုက်ရပြီ ၊ ဒါ့ကြောင့် ဒီအိမ်ကို မရောင်းတော့ဘူး…”

**********

ကျွန်မတို့တစ်တွေဟာ ကိုယ်ပိုင်ဆိုင်ထားတဲ့အရာက ကိုယ်ကိုယ်တိုင် တကယ်လိုချင်နေတဲ့ အရာဖြစ်နေလို့ ဖြစ်နေမှန်း မသိဘဲ ပိုင်ဆိုင်ပြီးသားတွေကို စွန့်ပြစ်ဖို့ ကြိုးစားကြတယ်…. ကိုယ်လိုချင်နေတဲ့အရာတွေ ကိုယ့်မှာ မရှိဘူးအထင်နဲ့ တခြားမှာနေရာမှာ ရှာဖွေဖို့ ကြိုးစားနေမိကြတယ်…. တစ်ခါတစ်လေ ကိုယ်လိုချင်တဲ့အရာက ကိုယ်ပိုင်ဆိုင်ပြီးသားပါ့လားဆိုတာကို သူများပြောမှ ၊ သူများမြင်အောင်ပြမှ သိရတတ်တဲ့အကြောင်း ဒီစာလေးက ဖော်ပြသွားပါတယ်…. ဒီစာထဲက ချမ်းကိုကတော့ သူပိုင်ဆိုင်ထားတဲ့အရာဟာ သူတကယ်လိုချင်တောင့်တခဲ့တဲ့ အရာပဲဆိုတာကို အချိန်မှီသိရှိသွားခဲ့ပါတယ် …. ဒီစာလေးကို ဖတ်ပြီး ကျွန်မတောင့်တောင့်တတ လိုချင်နေတဲ့အရာတွေ ကျွန်မပတ်ဝန်းကျင်မှာများ ရောက်နေသလားဆိုပြီး လှည့်ကြည့်မိပါတယ်… ။

မိုးထက်အိမ်
Dec 3, 2009
1:01pm

2009: 12/03
POSTED BY: မေကျော်
CATEGORY: ဆောင်းပါး
17 comments

ကျွန်မနှင့် အိမ်ထောင်ရေး

တဂ်တဲ့သူကလည်း မညှာမတာပါပဲ…. ကျွန်မနှင့် အိမ်ထောင်ရေးကို ရေးပေးပါတဲ့…. ချစ်ခြင်းကိုတောင် ခုမှ နားလည်သလိုလို မလည်သလိုလို သေချာအောင် လုပ်နေရတဲ့လူကို အိမ်ထောင်ရေးအကြောင်းရေးခိုင်းတော့ နည်းနည်းမဟုတ်ဘူး ၊ တော်တော်ကို အကြပ်ရိုက်ပါတယ်….အဲဒါနဲ့ တဂ်ထားတဲ့လူကလည်း ခုတလော ဘယ်ရောက်နေလဲလည်း မသိဖြစ်နေတာရယ် ၊ ရေးလို့မရနေတာရယ်နဲ့ ပေါင်းပြီးပစ်ထားလိုက်တာ တော်တော်ကြာသွားတယ်…. ခုတော့ ကြိုးစားပြီး ရေးလိုက်ပါတယ်….

အိမ်ထောင်ရေးဆိုတဲ့ စကားလုံးကြီးက တကယ်တမ်း ကျွန်မနဲ့ ဘာမှ မသက်ဆိုင်တဲ့ တစိမ်းတရံစာပါ….

အိမ်ထောင်ရေး ဆိုတာကို ကြားလိုက်မိတိုင်း ကျွန်မစဉ်းစားမိတာက ဘာ့ကြောင့် အိမ်ထောင်ပြုဖြစ်သလဲ ဆိုတာပါပဲ…. ကျွန်မအတွက် အဖြေတကယ်မရှိတဲ့ မေးခွန်းပါ…. အဲဒါနဲ့ နီးစပ်တဲ့ လူတွေကို မေးကြည့်မိတယ်…. ဘာလို့ အိမ်ထောင်ပြုတာလဲ… အော် ရှင်းနေတာပဲ ချစ်လို့ပေါ့ ၊ လူသားတာဝန် ကျေပွန်အောင်လို့ပေါ့ ၊ ဆေးပေးမီးယူ အတွက်ပေါ့ ၊ အမှီသဟဲဆိုတာ လိုတယ်လေ စသည် စသည် ဖြေကြတာတွေ စုံလို့ပေ့ါ….

အဲလိုဖြေကြတဲ့ လူတွေကို နောက်ထပ် မေးခွန်းတစ်ခု ထပ်မေးကြည့်မိတယ် …. ဘယ်လို ယုံကြည်မှုနဲ့များ အိမ်ထောင်ပြုဖြစ်သွားတာလဲ ….. အဲလိုမေးလိုက်တဲ့ အခါမှာတော့ သူတို့ဆီက တူညီတဲ့ တုန့်ပြန်မှုတစ်ခု ရခဲ့ပါတယ်…. ဘယ်လိုတုံပြန်မှုလဲဆိုတော့ တအံ့တသြလေး ပြန်ကြည့်ကြတာပါပဲ…. နောက် သူတို့ကပဲ တူညီတဲ့ မေးခွန်းလေးတစ်ခု ပြန်မေးကြသေးတယ်….. ယုံကြည်စရာလူ မတွေ့ဖူးသေးဘူး မဟုတ်လား တဲ့…..

ဘယ်လိုပြန်ဖြေရပါ့နော်…. ကျွန်မတော့ ပြန်ပဲ ပြုံးပြမိတာပဲ …. သံသယများတဲ့ လူသားတစ်ယောက်ဖြစ်တဲ့ ကျွန်မအဖို့ တစ်စုံတစ်ယောက်ကို တစ်ဘ၀လုံးအတွက် ယုံကြည်ကိုးစားဖို့ဆိုတာ တော်ရုံလွယ်တဲ့ အရာမဟုတ်…. အဲဒါကြောင့် ပြန်ပဲ ပြုံးပြမိပါတယ်…

သူစိမ်းနှစ်ယောက် ပေါင်းစပ်ကြမယ့် အိမ်ထောင်ရေးတစ်ခုမှာ တစ်ယောက်နဲ့တစ်ယောက် ယုံကြည်မှုက တော်တော်အရေးပါပါတယ် … တစ်ယောက်နဲ့ တစ်ယောက်ရဲ့ အကျင့် ၊ ပညာ ၊ သိက္ခာ ဒါတွေကို ယုံကြည်ဖို့ လိုပါတယ်…. ယုံကြည်ရုံတင်မဟုတ်ဘဲ အပြစ်အနာအဆာရှိခဲ့ရင်လည်း ခွင့်လွှတ်နားလည်ပေးနိုင်ရပါမယ် …. ခွင့်လွှတ်နားလည်ပေးဖို့အပြင် အပြန်အလှန်လည်း ကူညီဖေးမပေးရပါမယ် …. ကူညီဖေးမတယ်ဆိုတဲ့ နေရာမှာလည်း ရုပ်ပိုင်းဆိုင်ရာရော ၊ စိတ်ပိုင်းဆိုင်ရာပါ ကူညီဖေးမမှု လိုပါတယ် …. ရုပ်ပိုင်းဆိုင်ရာမှာ ငွေးရေးကြေးရေးကို ဆိုလိုချင်တာ မဟုတ်ပါဘူး … တစ်ယောက်နဲ့တစ်ယောက်ရဲ့ တာဝန် ၊ ၀တ္တရားတွေကို ကူညီလုပ်ဆောင်ပေးတာကို ပြောချင်တာပါ…. ဒီလိုမျိုးတွေလုပ်ဖို့ဆိုတာကလည်း ချစ်ခြင်းဆိုတဲ့ တံတားရှိမှ လွယ်ကူမယ် ထင်ပါတယ်…

ဒီချစ်ခြင်း ဆိုတာမှာလည်း အကောင်းရော အဆိုးရော ရှိပါတယ် …. ချစ်ခြင်းကြောင့် ပျော်ရွင်ချမ်းမြေ့ရသလို စိတ်မချမ်းမြေ့ရတာတွေလည်း အများသားပါ… ဘယ်လိုပဲ ဖြစ်ဖြစ် ချစ်ခြင်းကြောင့် စိုးရိမ်ခြင်း ၊ ချစ်ခြင်းကြောင့် ကြောက်ရခြင်းဆိုတာတွေကတော့ ချစ်မိသူတိုင်း ကြုံရမယ် ထင်ပါတယ်…. အဲဒီလို စိုးရိမ်ရတာ ၊ ကြောက်ရတာတွေကို မနှစ်သက်တဲ့ ကျွန်မအတွက် အိမ်ထောင်ရေးဆိုတာကြီးက အရင်ကတည်းက သူစိမ်းပါ ၊ ခုလည်း သူစိမ်းပါပဲ …. နောင်များလည်း သူစိမ်းတွေထဲက သူစိမ်းပဲ ဖြစ်နေဦးမလားဆိုတာတော့ ဘုရားမှ တပါး အခြား မသိလို့ပဲ ပြောရမယ် ထင်ပါတယ်….

ဆက်လက်ပြီး-
ကျွန်မနှင့် အကြောင်းအရာများကို ရေးတဲ့ အမ မချစ်ရ ၊ ဖုန်းပြောတယ် ဆိုတာ လူချင်းမတွေ့ရဘဲ အဲလောက်ပဲ တတ်နိုင်လို့ … အဲလိုလေးပဲ ရူးနေရတယ် ဆိုတဲ့ ကိုသိဂါင်္ရ နဲ့ လက်ထက်ကာနီး သတို့သား အလောင်းအလျာလေး ကိုပြည့်ဖြိုး တို့ရဲ့ အိမ်ထောင်ရေး သဘောထားလေးတွေ ကြားချင်ပါသေးကြောင်း….

မိုးထက်အိမ်
Dec 1, 2009
2:05pm

2009: 12/01
POSTED BY: မေကျော်
CATEGORY: Tag
ကိုယ့်အကြောင်း
17 comments

စိတ်ကူး သုံ့ပန်း

*ခရီးတွေ မိုင်တွေ
ဖြစ်နိုင်ရင် မပြောချင်ဘူး
နင်နဲ့ငါ့ကြား
ခြားနေတဲ့ အကွာအဝေး
မှန်းလိုက်ရင် လွဲချည်းနေလို့…။

*ဘောင်တွေ အနားသတ်တွေ
ဖြစ်နိုင်ရင် မရှိစေချင်ဘူး
နင်နဲ့င့ါကြားက
ခြားထားတဲ့ အဖြူရောင်မြစ်
တံတားအဖြစ် အသွင်ပြောင်းချင်လို့….။

*သ၀န်တိုတာတွေ ၊ ချုပ်ချယ်တာတွေ
ဖြစ်နိုင်ရင် မကြားဖူးချင်ဘူး
နင်နဲ့င့ါကြား
ဘယ်လိုအကြောင်းပြချက်နဲ့မှ
ဒီစကားလုံးတွေ သုံးခွင့်မရှိလို့….။

*တူညီမှု ၊ တိုက်ဆိုင်မှု
ဖြစ်နိုင်ရင် သိကို မသိချင်ဘူး
နင်နဲ့င့ါကြား
ခြားတာတွေ အများသားမို့
နားလည်မှုဆိုတာတွေချည်း သုံးနေရလို့….။

*ကဲ တွေးနေတာ ကြာပါတယ်
နင်သိအောင် ပွင့်ပွင့်လင်းလင်းပဲ ပြောမယ်
နင့် ကို ….
ငါ ….
ချစ် တယ်….။

*အဟား … ဒါတွေက စိတ်ကူးတွေပါ
တကယ့်လက်တွေ့မှာ
ခပ်တိုးတိုးကြုံးဝါး
ယောက်ျားလေးဖြစ်ရင် ကောင်းသား…။
မိုးထက်အိမ်
Nov 25, 2009
1:22am

2009: 11/25
POSTED BY: မေကျော်
CATEGORY: ကဗျာ
16 comments

အပြောချင်ဆုံးစကား

ကျွန်မ ၏အပြစ်ကို မြင်၍သော်လည်းကောင်း ၊ ကြား၍သော်လည်းကောင်း ၊ သံသယရှိ၍သော်လည်းကောင်း ကျွန်မအား သနားသဖြင့် ထောက်ရှု၍ ပြောဆိုသတိပေးပါ ... အပြစ်ကို ရှု၍ ကုစားပါမည် ...

RSS FEED

ဟိုစပ်စပ် ဒီစပ်စပ်နဲ့ ဘာတစ်ခုမှ နက်နက်ရှိုင်းရှိုင်း မသိသူ :P

ဒီနေ့ စိတ်ထဲရှိရာ…

ကြောက်တယ် ...

ကျွန်မ ရာသီ အမှတ်တံဆိပ်

Competitive and sportive. Don't like losing and always cheerful ! I m trustworthy, and very out going. I choose love carefully, and don't fall in love easily. But once i find the right one, i don't let go or a long time.